المراجعة
الأخيرة
راجع أيامك راجع لياليك
شوف الصدمة كانت فين بتجيك
ومين كان بيساعدك بالتسليك
وأى صديق كان بيوعيك
ومين المصلحجى إن عديته بيعديك
وشوف كمان كم مرة أكلت فرخة و ديك
ولا الفول كان دايماً بيناديك
وهل لبسك كان لبس شيك
ولا بواقى من بواقى بوتيك
وكم مرة وصلت زويك
ولا كان الأمر مرة ليا ومرة عليك
ومين فى الفرح كان بيدعيك
ووقت الحزن كان بيعزيك
وفى الأزمات تناديه و يناديك
وفى العادى لا بتأذيه ولا يأذيك
بتزور والديك
فى الدنيا كانوا عضديك
كنت عايش فى الأوهام شبيك لبيك
ووقت الصحوة تعض إيديك
وانت من إمبابة وقت الراحة تاخد تعسيلة
وفى المهندسين تاخد بريك
وفى الصبح فى الدقى تاكل كيك
وفى دشنا تاكل شريك
والمعروف كان بيتمر فيك
ولا وقت الجد تقول يا فكيك
وفى البيت تجد من يحنو عليك
و يواليك بالتدليك
ولما تعود محمل يقولك تسلم إيديك
كم مرة كانت بتغديك
وكم مرة كانت تنام من غير ما تعشيك
بتاكل مسلوق ولا تسبيك
ربنا يعافينا و يعافيك
هل شاركت فى إنتخابات البرلمان
أم أن الأمر لا يعنيك
مية النيل بترويك
بالخير فى واديك
والعمر ليا و ليك
وتنشل إيد مين يعاديك
خبز التموين بيكفيك
والفرق سلع ترضيك
بتتغطى غطا سميك
ولا بطانية واحدة بتدفيك
إنت ساكن إيجار و لا تمليك
ربنا يدينا و يديك
سنة تشيلك و سنة ترميك
الشعر دا شعر ركيك
ولا زى الفريك ما يحبش شريك
أنا برأيك أعتز به و بيك .
ليست هناك تعليقات:
إرسال تعليق